Nièts
27-01-2012: Ut trio van de Törvers
Det de Törvers un joeksige vereiniging zien, det wiste weej al. Waat weej neet wiste, is det zeej wiste, det weej minstes zoe joeksig zien. Kint geej ut nog vollege? Det de wiëze raod van de Törvers wét waat ze duit muug duudelik zien, noow zeej eur Trio van 2012 oét de stal van ôs kepél hebbe geplokke.
Gaer fillecitere weej schuufwonder prins Bérke den iérste, met zien trompetterende adjudante Loek en Patrick!
14-03-2011: Oëtbreiding van de brandweerwaage!
Aafgelaupe jaor zièn weej weer drök bezig gewaes um waat veranderinge aan te bringe aan ôzze brandweerwaage.
Zoëas geej kint zeen in ôs eige 'kweekvièver' zièn d'r in aafgelaupe jaore ein haup blaage beejgekômme (en kômme d'r nog miër beej). Um waat veuroët te laupe op d'n tiëd hebbe weej gemeind um ût plateau baove-op de waage te vergruuëte.
Mit ein aantal gooije sponsore, vakluuj en eige inzet is ût ôs gelök um ût plateau 5,5 veerkante maeter oët te breide.
Alzoë is ût meugelik det weej ein aantal van ôs blaage mei kinne neme in d'n optoch, zoëdet weej de vastelaovend en de mezièk eur mit de paplaepel kinne ingaeve.
Weej wille Frank van herte bedanke veur zièn vakkundige hölp en inzet um dit allemaol meugelik te make!
14-03-2011: Vastelaovend 2011
Zoë, det waas ût dan. Auk de vastelaovend van ût spesjale jaor 2011 is alweer veurbeej.
Waat vluug d'n tiëd!
12-02-2011
Ût begôs allemaol mit ôs iërste optreeje op d'n prinsebal van V.G. de Vogelhut. Dao hebbe weej in ein korte tiëd efkes de tent op ziène kop gezat. Gewoën effe remmiedemmie make is ein van ôs spesjaliteite.
13-02-2011
D'n daag daornao is tradisjoneel ôzze iërste optoch in de Wien. Al jaore is dèt ôzze generale rippetisie um te kièke of ôzze waage nog good riëd. Erg gezellig is veural de resepsie die daorop volg.
19-02-2011
Ein waek later waas de sjieke hofbal van VVG Jocus en det beteikent det d'r dan eigelik niks anders te doon is in de stad. Aevel haet VG de Törvers heej waat op bedach. Zeej halde dan eur eige "vreeje aovend" waor weej veur de twiède kièr op riej ôs klanke hebbe meuge laote huuëre.
26-02-2011
D'n lange daag waas aangebraoke.
's Morges ware weej oëtgenuuëdig um beej TV Limburg live op d'n tillevisie te speule. Tièdes de marathon-oëtzending mochte weej tösse 10:00 en 12:00 oor ôs klanke laote huuëre um de oëtzending te begeleide.
Veur idderein dae det gezeen haet: Op maondaag hebbe weej ôs rippetisie en dao kint geej de handteikeninge kômme aafhaole.
's Middaags waas ôs alitëd zoë gezellige optreeje beej de Päörtjes in Venlo-Zuud. Al 6 jaor träöte weej daor de resepsie aanein.
's Aoves waorte weej verwach op ût Narrebal van de 3-kes. Rond ein oor of kwart euver tien hebbe weej daor auk in ein korte tièd de tent op de kop gezatte.
05-03-2011
Zoë wiè ein echte joekskepèl zièn auk weej internasjonaal bekint. Iddere zaoterdaag veur de vastelaovend rieje weej mit ôzze brandweerwaage de peul euver.
In Bracht bringe weej dan ôzze klanke in de erg lange optoch.
06-03-2011
Einmaol truùk in Venlo, gaon weej auk nog ens de brök euver. In Bliërick hebbe weej ein zonnige optoch meigemak en vuuël plezeer belaef aan alle bliërickse minse.
In ût begin van de aovend hebbe weej ôs gemeld in de Steinstraot veur ût jaorlikse inträöte van de Vaegers. Tradisjoneel äöpene weej dit evenement door ein paar echte knallers te träöte.
's Aoves hadde weej waer ût tofste optreeje van gans ût jaor. De joekskepèlle parade van de Frette.
Idder jaor kièke weej heej naor oët. Auk dit jaor is ût ôs good gelök um alle minse mei te laote bewaege op de schoëne, maar veural harde klanke, van ôs kepèl.
07-03-2011
Ôzze letste daag um te träöte. De waage waort weer gehaold en dit jaor versierd daor VV de Wien. Zeej bestaonde dit jaor 4x11 jaor en hadde ôs gevraog um eur in de Venlose optoch te begeleide. Ût zunke scheen en ût bleef druuëg, dus det waar ein geslaagde optoch!
Alzoë hebbe weej as Joekskepèl Dreej Daag Um weer eine geweldige vastelaovend gehad!
10-02-2010: Optochnummers
Potdomme, ut kump noow toch waal erg dichbeej. Eine korte updeet as geej os urgent taege ut lief wilt laupe.
In Brach is ut netuurlik maar de vraog, maar de kans is waal huul erg groeet det weej auk dit jaor weer optochnummer 3 toegekint kriege.
In de Blierickse optoch hebbe weej nummerke 22.
Met d'n optoch van Venlo rieje weej onder nummer 45.
Op de Joekskepelle Parade staon weej al um 19.30 oor op de buhn. En daoveur um 18.00 oor op de Steinstraot.
Weej winse idderein unne geweldige vastelaovend!
24-01-2010: Trio Vogelehut
Ut kos auk neet oetblieve, want idder jaor is ut waal raak. Schienbaar is ut algemein bekint det weej joeksige jonge zien, want auk dit jaor is der eejmus oet os midde verkoze in ein vastelaovestrio.
Zonder te weite waat der ging gebeure verzamelde weej os vriejdaag beej os thoeshonk ut Gildehoes. Van dao oet ging ut te voot bergopwaarts naor de Vogelehut. Toen waas ut netuurlik al vlot duudelik wae of det der oet zoel komme.
Weej wille ozze bariton-ster Stef Donders van herte felicitere met zien adjudant-schap. Auk zien broor Hans, dae ierelid en vaste chauffeur van ozze Daf is, winse weej van herte perficia as ziende de nieje prins van de Vogelehut. Jonges, maak der unne fantastische tied van. Met og recepsie komme we der zeker weer ein paar kleppe!
« veurige 1 2 3 volgende »